早幾日喺屋企睇Facebook時見到小交有廣告彈出，原來今個星期五和六晚有表演，重點是今次與韓國音樂家朱亨基合作，搞笑嘅海報吸引咗我。
本來我都唔係好記得朱亨基呢個名，但我就好記得佢個樣。10幾年前我已經喺Facebook睇過佢好多表演片段，當時我已經覺得佢係古典音樂界嘅鬼才。
今次見到廣告，即刻上網買飛。主要係我自己想睇，其次係都想媛子學習欣賞古典音樂會，而且朱亨基超級搞笑嘅古典音樂表演，已經比較適合小朋友睇。
今日星期六係我同老婆每星期最忙果日，我哋做完嘢，快快脆脆喺琴行食少少嘢，然後返屋企帶媛子去大會堂，啱啱好8:00入場。
現場有好多小朋友睇。咁多年，朱亨基個樣無變過，呢個鬼才而家一人集概念、鋼琴、指揮、作曲、編曲、主持於一身，真係好勁。
表演亦不負所望，介紹古典音樂之餘也十分搞笑，啲小朋友最鍾意睇搞笑嘢，例如有演奏者走音、打乞嗤、鬧交、扮貝多芬、扮熊人、瞓覺、演奏途中走人、突然超大聲演奏（Surprise Symphony）等。
節目中除咗海頓的音樂外，重有拉威爾、德布西，同埋朱亨基自己改編嘅古典音樂。每首都精彩搞笑。
有時主持彈緊慢歌時，媛子問我：「幾時再有搞笑嘢呀？」其實佢都好鍾意睇，不過可能只限搞笑嘢。不過我都有同佢介紹一下樂團入面演奏者嘅表演。
媽媽問媛子：「你鍾意睇Jeremy演唱會定今晚音樂會？」媛子答：「兩個。」
