朝早送阿女返學

媛子升小一，我哋無安排校巴，因為其實屋企同學校嘅距離都只係四五個巴士站，為咗時間容易控制，我哋叫工人早啲起身送返學，然後返屋企可以再休息多一兩個鐘。

不過近半年我多咗嘢做，好多時夜晚返屋企果陣，媛子已經瞓咗覺，即係全日我都無同媛子相處過。

由於自己工作時間比較彈性，所以我都安排一星期有一個朝早送返學，同埋一兩日接放學。

送返學要6:30前起身，7:30左右返到學校，8:00又返到屋企附近。樓下間cafe我經常幫襯，每朝8:00開，通常我都會去飲杯精品咖啡，然後返屋企瞓多一陣。